دبوس ..دفتر مخالفات وبده يخلص
لازم تخصص جزء من راتبك لمخالفات السير الفلسطينية وجزء للشرطة الاسرائيلية وجزء لشرطة البلدية …او بتبيع سيارتك بخسارة شوي حتى تخلص من هموم المخالفات ..او بتشتري حمار تروح وتيجي عليه مثل ما عمل زميلنا رومل في يوم من الايام وبهيك بتتخلص كمان من الوقود .
بخصوص شرطة الاحتلال بتدفع من غير نقاش لانه جاي خصيصا من شان يخالفك وما بعرف الرحمة بضحك وبتساكع وبحكيلك خففتلك اياها من 2000 شيقل لـ 750 بس، تقول انك سارق الشارع ..وماخده على داركم ، واذا وقعت ووقفك بطلعلك مخالفة من غامض علم الله …
اما شرطة البلدية بكون الشرطي ينتظر فوق راس السيارة اذا خلص العداد وانت بعيد 100متر خلص كتبها ..يا عمي بده يحافظ على امن المرور ما بقدر وما بطلع في ايده ينتظر شوي ..دفتر وبده يخلصه …وهيك انت بتروح محروق دمك لانك نزلت تشتري من البلد شوية خضار ولا غرض تافه ..احسن اشي تروح تشتري من الحارات وتبعد عن المخالفات ..
بس معقول الشرطة بتشوفنا لما نخالف وما بتشوف زعران التشحيط وما بتشوف الماتورات اللي في الشوارع !! معقول ما بشوفوا بعض سائقي العمومي الي على الاقل في اليوم الواحد برتكب 10 مخالفات ! طيب ما بشوفوا الشرطي صاحبهم اللي ماشي من غير نمره وفاتح المسجل على الاخر ..زي اللي شغال طريب ..يعني بطرب الناس في الشارع ! يلا خلينا ندعم البلد بالمخالفات …طيب ليه الشرطي تارك الازمات المرورية والشوارع الصعبة وجاي يدور هون وهون على مخالفة ؟ .
رابط قصير:
https://madar.news/?p=19006
