دبوس ..دير بالك يا ابني تكون حطب للموقدة

دبوس ..يا ابني ..شايف يا ابني قديش استنيتك لتكبر شوي ..شوف صورتك وانت صغير ..شوف شو كنت تلبس حلو وشو كنت توكل الي بتحبه، وشو كنت وكنا فرحانين فيك  .. وكل يوم كنا نحكيلك كبرنا يوم يا بابا …شايف يا ابني قديش انت مهم في حياتي وحياة امك واهلك ؟ دير بالك تكون متطرف في الدين والقبلية والعشائرية والحزبية، الي ما بتذكرونا الا في يوم الانتخابات .

دير بالك تحمل سكين في حقيبة المدرسة، من شان تقول لصحابك انك رجال ..دير بالك من اصدقاء السوء وزعران الشوارع الي ما الهم اهل ..دير بالك من الدخان والانحراف، احذر من المخدرات الي بزرعوها الاشرار الي بدهم يقتلوا امثالك ..

دير بالك من الي ببعثك للموت وهو باعث ابنه لمنحة خارج لبلاد ..سلاحك مدرستك وجامعتك هي مستقبلك ومستقبلنا…وخلينا في حالنا وخليهم في حالهم …شايف يا ابني الاحتلال شو قاتل ..ما بخلي فرصة الا بحاول يقتل الاطفال وبتهمهم بالارهاب …خليك واعي …شعبك بده علمك ما بده تموت مجانا ..

يا ابني البلد فيها وطنيين احرار، لكن فيها كمان مستفيدين واشرار شغالين ومشغلين مكاتب بحكوا عنها مؤسسات بـ اسم الوطن،مشكليناها لجمع الدولارات .. البلد بدها اياك .