الشريط الأخباري

دبوس ..شمالي جنوبي ..في مصاري للفنادق ومفيش مصاري للمشافي!

مدار نيوز، نشر بـ 2017/05/07 الساعة 8:07 صباحًا

مدار نيوز : هذا الدبوس بحكي عن تشابه في غير مكانه ..يعني تقسم الضفة وغزة بشبه تقسيم الكوريتين شمالية وجنوبية ..الشمالية بتدفع ضرائب لانها غنية يعني كأنه يعني .. والجنوبية معفية لفقرها يعني كانه يعني .. هذا هو التقسيم الاداري في بلادنا المحتلة.

هناك في الجنوبية عندها سلاح وخوازيق..وطول نهارهم يحكوا عن الانتصار في اي معركة بخوضوها رغم كل الهزايم الي اكلوها، وما عندهم مصاري لعلاج مريض .

وهون في الشمالية خوازيق بس ..مش مهم احنا متعودين على الخوازيق ..ومش متعودين على العدالة الاجتماعية…في مصاري للفنادق وما في مصاري للمشافي

شو هالحكي …

هون عنا حكومة بتجمع مصاري من الناس لانه الدول المانحة بطلت تدفع كثير زي زمان بدها تعوض العجز ..هون مشافي القدس بطلت تقدر تعالج الناس ..يعني موت يا ناس …

هون مفيش اموال للمشافي الا شوي شوي ..وهناك في مرضى كثير كثير ..هناك في عتمه ومش شايفين الضو ..وهون في كهربا ومش شايفين الضو …في الاخر زي بعض كلنا مش شايفين.

بتطلع وفود من هون وهناك على الدول العربية  والاجنبية وبعملوا ولائم وتذاكر سفر  وبدفعوا الاف الدولارات..يعني بنصرف المصاري الي بنجمعها من الناس في مكانها !….ولو احنا لازم نتواجد، ولازم نقول للدول احنا مثلكم ومش اقل منكم، احنا زلام.

وهناك وثيقتهم من فندق لفندق ..شو بتفرق معي، عندهم اموال للفنادق وما عندهم للمشافي..عادي المشافي بتشتغل بالمدد ..ربنا ببعث مصاري في الليل للفقراء ..بس الفنادق ما بتعرف ربنا وبتاخذ (شندي) وبتم الدفع.

في الشمالية والجنوبية الشبه الوحيد بيننا بنحب الفنادق والسفر، ودائما في مصاري للمدراء والسفراء وعلية القوم ..وبنشتم الظروف وبنحمل الاحتلال السبب.

العدالة الاولى ان الفقراء هون وهناك متشابهين ..الم واحد…و العدالة الثانية ..القادة هون وهناك متشابهين يعشقون الفنادق والعرط. ….اعرط

 

تعليقات