دبوس …مين اكبر المعارضة ام الموالاة ام البلد ؟
مين اكبر المعارضة ام الموالاة ام البلد ؟…مش مهم انه عدد عناصر المعارضة الي خرجوا اليوم في رام الله كانوا ينعدوا على الاصابع، المهم انه في معارضة وعندها قناعات مختلفة لازم نحترم وجودها.
مش مهم انه حركة فتح عملت مسيرة بنفس الساعة مع مسيرة المعارضة، المهم انه حركة فتح لا زالت بتقدر تخرج وتنظم مسيرة وتقول انها الملاذ الاخير.
مش مهم انه الامن قام بوضع عراقيل امام مسيرة المعارضة، المهم انه المعارضة طلع صوتها في الشارع ومش على الفيسبوك فقط.
اليوم واحنا بنشوف معظم دول الجوار وشو بصير فيها بنقول الحمدلله احنا بعدنا بخير ، واوفياء للبلد …ما عنا شك انه كل الي كانوا في شوارع رام الله اليوم ناس وطنيين، وقلناها من اول …الرئيس بتحمل حكي وياما تحمل من لقراب ومن لبعاد..
المهم انه في بلد والها رئيس وفيها معارضة ايجابية، وناسها مختلفين على اسلوب قيادتها، وهذا اشي طبيعي وغير هيك بنكون شعب ميت بلا وجود..
وانت بتقول انه البلد بلدنا وان الحركة النا تذكر انه في وطن للجميع وما في حد اكبر من الوطن، بس من شان ما نضيع لازم تعرف انه طبيعي نختلف، لكن بدون ما نسمع اسعاف ولا رصاص ولا نشوف دم ..لانه حدث وبمر وفي اخر النهار بتجمعنا البلد…الحمدلله عالسلامه يا بلد.
