دبوس هالة …تسجيل في الجامعة

دبوس هالة الوزني …تسجيل الطلبة الجدد.
إجت عندي ست بتسألني إذا معدل بنتها بيسمحلها تدرس تمريض، لما شفت معدل قبول التمريض قلتلها صعب.
المهم قرقعت راسي وهي تحكيلي طيب بنتي مصرّة عالتمريض شو أعمل، حكيتلها إنه لازم تختار تخصص ثاني
قربت عليّ توشوشني، حكتلي “في خيار إنها تدريس التمريض بكلية الروضة سنتين، وبعدين بحجزوها تشتغل معهم سنتين وممنوع تخطب أو تتزوج بهالسنتين
وهاي مصيبة، أعوذ بالله كل شي ولا نصيبها للبنت”.
ما عرفت شو أرد عليها، خايفة على نصيب بنتها وهي لسّه بكون عمرها 20 أو 21 سنة، إذا الأم بتفكر بهالطريقة ف الله أعلم كيف بنتها بتفكر.
وقصص كثير بنشوفها،
أب رفض بنته تدرس إعلام لأنه فيه اختلاط على حسب قوله، حسسني إنه ملهى فاتحينها بالكليّة. والبنت نقاش ما ناقشته، قعدت وسكتت بدها إياني أنا أقنع أبوها بس للأسف هو والحيط واحد.
*الطالب اللي بسمح لأهله يقرروا عنه التخصص متجاهلين رغبته وشغفه بإشي، يضل قاعد بالبيت أحسن إله.
رابط قصير:
https://madar.news/?p=580