تكريم المدارس ..دس للسم بالعسل …انس الحمدالله

القصة مش قصة تكريم محجبات بمدرسة ولا فعالية صغيرة من هاد النوع , الفكرة لما بعد الفعالية , للسم المدسوس بالعسل
الفكرة أنه هاد أول أعلان نوايا صريح بشكل واضح وعلني
أنا بدي أحكي عن أشي شفته بشكل شخصي , سياسة خلق فرق بين الطالبة المحجبة والطالبة الغير محجبة هي سياسة موجودة بأغلب مدارس البنات الحكومية
تحديداً عند معلمات الدين
الي ببلشو من صف سادس تفريغ حصص الدين وتأطيرها بما هو خارج المنهج والأتجاه نحو موضوع الحجاب وترهيب الطالبات بمرحلة عمرية صغيرة من النار وجهنم وبئس المصير والحديث عن أنه ربنا بعلق البنت الغير محجبة من شعرها في جهنم ” يا جماعة طالبة في عمر الزهور طفلات بنحكالهم هيك حكي ؟؟؟ ”
ثم في 10 علامات متروكات للمعلمة بتصير تتعامل معهم معلمة الدين كنوع من أنواع الابتزاز وبتقول انه رح تعطي البنت
علامة كاملة والغير محجبة علامة قليلة
مع أنه المعيار لهادي العلامة الالتزام الصفي مش الالتزام الديني
أو بتكون سياسة ترغيب عمياء جداً غير مفهومة لأطفال بعمر الزهور
انا صراحة بتعامل مع مدرسين الدين في المدارس الحكومية أنهم منظومة وحدة وأنو في قوة ما هي الي بتوجههم لهيك تصرفات
لأنه مش معقول اغلبية مدارسنا بتعاني من نفس الموضوع وتحديداً في القرى الصغيرة
انا مثلاً بأكثر من مرحلة صفية في اساتذة دين كانوا يمنحوا علامة النشاط كاملة للطالب الي بصلي بالمسجد الي بصلي فيه استاذ الدين
وأنا حتى صراحة هاد الي بحكوا عنه اسلوب ترغيب بالصلاة , بشوفه أسلوب بأسس لحالة من النفاق والرياء الديني
الدين واضح الدين لا بده ترهيب وتخويف ولا بده ترغيب كاذب وغير حقيقي
القصة عنا مش قصة طالبة تحجبت او ما تحجبت
القصة أنه هاد أعلان نوايا حقيقي وصريح وبداية تأسيس لمرحلة من التمييز والتفرقة العنصرية على أساس ديني
التكريم بكون للأفضل , ومجرد اعطاء ايحاء ولو من خلال تكريم أنه الطالبة المحجبة تستحق التكريم والطالبة الغير محجبة تضل قاعدة بالصف هيك منكون لغينا حرية الفكر والاعتقاد
المدرسة مكان للتعلم والتعليم والتنافس بكون فيها على أساس علمي بحت وأنشطة لا منهجية تتعلق بالحياة المجتمعية وليس أمور دينية
انا بجوز بكبر الموضوع بس انا شخصياً رح أضل أحكي فيه لكي لا نلدغ كما لدغ العراق وكما لدغت سوريا
القصة مش قصيرة صغيرة أطلاقاً هي صراع بين النور والظلام ممتد في كل بقعة من بقاع الوطن العربي

رابط قصير:
https://madar.news/?p=58735

هذا المقال يعبر عن رأي صاحبه فقط.